درانگانی شەو لە رێگای فەیس بووکەوە زانیم
ئەبوبەکر شەریعەت پەنا هاوڕێی دەورانی قوتابخانەم و دڵسۆزێکی نیشتمان و چالاکێکی
کلتوری شارەکەمان کۆچی دوایی کردوە، زۆر دڵگرام بووم بۆ ئەو کۆچە ناوەختەی ئەویش
بۆ کەسێکی وا دڵسۆز و چالاک کە داهاتوویەکی زۆر روونی هەبوو.
''بەکرە''١ی کۆچکردوم لە دەورانی
منداڵی و زیاتر لە سەردەمی قوتابخانەدا ناسی کەسێکی ئارام و لەسەرەخۆ بوو هەروەها
گیانێکی یارمەتیدەرانەی زۆر باشی هەبوو هەمیشە ئامادەی یارمەتی دان و هاریکاری
کردن بوو. هەرکات داوای یارمەتیت بۆ کارێک لێکردبا ئەوا بە روخۆشانەو ئارامیەکی
تایبەت بەخۆی یارمەتی دەدای و بە ئارامی و دۆستانە بۆت دەدوا.
ئێستا کە ئەو دێڕانە دەنوسم شێوەی پێکەنینەکانی وەک فیلمێکی بێدەنگ دەبینمەوە
و لەو دەورانەدا جەولە دەدەم و یادو بیرەوەری ئەو دەورانە دەمبەنەوە زێدەکەم و
هەڵبەز دابەز و هارو هاجیەکانی منداڵیم دەخەنەوە بیر کە جارو بار بۆ چۆلەکە کوشتن
و بازی تۆپێن رێم دەکەوتە گەرەکەکەی ماڵی بەکرە و ئەو براکەی "وەهاب"م
دەدیت.
لەو کاتەوەی کە زیدەکەم جێ هێشبوو هیچ
هەواڵێکم لێی نەبوو تاکوو ٦ ساڵ لەمەوبەر رۆژێک بابەتێکی کۆچکردوم لە وێبلاگی
''تیرۆژ'' دا چاو پێکەوت بەراستی دڵخۆش بووم و ئەوە زیاتر دڵخۆشی کردم کە دوایی
زانیم ماستەری کۆمەڵناسی هەیە. و زۆر چالاکانە خەریکی خەباتی کلتوریە لە سەردەشت.
لەو کاتەوە بەدواداچونم بۆ کارو چالاکیەکانی ناوبراو هاورێکانی کردووە لەوانەش پیرۆز
کردنی رۆژی جیهانی منداڵان و چالاکی ژینگە پارێزی و هەورەها چالاکی بە بۆنەی ٧ی
پوشپەرو دەیان چالاکی دیکە کە هەنوکەش بەردەوامن، زۆر شانازیم پێوە کردوون کە
لاوانی شارەکەمان خەمیان خەمی نیشتمانە و بۆ نەمانی خەم و کەموو کوڕیەکانی نیشتمان
ماندوو نەناسانە هەوڵ دەدەن بە بێ ئەوەی کە کەمترین چاوەروانیان هەبێت.
هەر چالاکیەکانی بەکرە و هاورێکانی بوو و
بووە کە زۆر جار گڕو تین دەداتە من بۆ خەبات و تێکۆشان لە پێناوی نەهێشتنی
کەموکورتیەکان و کۆمەڵگایەکی دادپەروەرو ئەوڕۆیی کە تاکەکان بە هەموو
جیاوازیەکانەوە ژیانی تێدا بکەن.
لە کۆتایی دا وێڕای دەربڕینی خەم و پەژارەی
خۆم بۆ لەدەستدانی ئەو لاوە چالاک و تێکۆشەرە، سەرەخۆشی خۆشم لە خەڵکی
سەردەشت بەگشتی و هاورێیان و چالاکانی
مەدەنی شاری سەردەشت و بنەماڵەی بەرێزیان دەکەم و هیوادارم کە روهی ناوبراو و
کوچکردوانی دیکە شاد بێت و داواشم ئەوەیەکە چالاکان و هاورێیانی کۆچکردوو بە بۆنەی
کۆچی ناوەختی ئەو لاوە تێکۆشەرەی نیشتمانەکەمان چالاکیەکی کولتوری بەڕێوە بەرن و
بەو بۆنەوە رێز لە کۆچکردو بگرن.
١. ئەوکات لە سەردەمی قوتابخانەدا بە
ناوبراومان دەگوت "بەکرە"
هیچ نظری موجود نیست:
ارسال یک نظر