''کریستینا کۆیڤونێن'' (Kristiina Koivunen) دڵسۆزێکی ڕاستەقینەی کوردستان

جەژنی نەورۆزی بۆنەیەکی باشە بۆئەوەی کە کوردانی هەرچوار پارچە لە دەوری یەک ببینی و لە دوری یەک بە شادی و خۆشی تێپبەر بکەی بۆ جەژنی نەورۆزی ئەو ساڵ هونەرمەندان ''عەزیز وەیسی'' و ''لۆکە زاهیر'' بانگهێشت کرابوون، بەڵام جیا لەوە ئەم بۆنەیە بۆ من دەستکەوتێکی دیکەی هەبوو ئەویش دیتنی بەرێز ''کریستینا کۆیڤونێن'' (Kristiina Koivunen)  ناوبراو کەسێکی کە هەموو کارو چالاکیەکانی تەرخان کردوە بۆ ناساندنی کورد و کێشەکانی و لەم پێوەندیەش دا چەندین کتێبی لەسەر کورد نوسیوە کە دەتوانم ئاماژە بەم کتێبانە بکەم:

١ـ کورد نەتەوەیەکی جینۆساید کرا (The Kurds A Nation of Genocides)،
٢ـ  کوردستان لە بەردەم سەربەخۆیی دا (Kurdistan itsenäisyyden kynnyksellä? )،
٣ـ سەفەرێکی هونەریانە لە ناوچەی شەڕ (Taiteilijatreffit sota-alueella )،
٤ـ رێبوارێکی قارەمان لە باشوری روژهەڵاتی تورکیە (Sankarimatkailijan Kaakkois-Turkki )،
٥ـ چا لە کوردستاندا  (Teetä Kurdistanissa )،
٦ـ سەرهەڵدان (Serhildan).
هەروەها چەندین جار سەردانی باکور، باشور و رۆژئاوای کوردستانی کردوە و هەروەها کۆمەلێکی زۆر سمینارو کۆڕو کۆبونەوەی لە سەر پرسی کورد لە زانکۆ و هەروەها لە شارەکانی فینلاند پێک هێناوە.

پێویستە ئاماژەش بەوە بکەم کە تەنانەت ناوبراو جارێک لە تورکیە لە سەر کێشەی کورد گیراوە و دەستبەسەر کراوە.

''کریستینا کۆیڤونێن'' (Kristiina Koivunen) مرۆڤێک پڕاو پڕ لە مرۆڤایەتی و دڵسۆزی بۆ کوردان کە بەراستی زیاتر لە کوردێکی دڵسۆز مشوور لە کورد و کوردستان دەخوات و هەوڵی ناساندنی و چارەسەری کێشەکانی دەدات.

شەوی جەژنی نەورۆزی 2714 ئەو خانمە بەڕێزەش هاتبوو کە چەندین کتێبی خۆی و کتێبێکی دیکەش کە لەسەر کورد نوسرابوو دانابوون بۆ فرۆشتن من لە لایەن دۆستێکی خوشەویست ئاگادار کرامەوە و من و دۆستەکەشم لە هەرکام لە کتێبەکان یەکی یەکدانەمان کڕین و ئەوەندەی ئاگادار بم زۆربەی ئەو کتێبانەی کە هێنابوونی لەوێ فروشران.

دوای کڕێنی کتێبەکان سپاسم کرد بۆ هەوڵ و ماندوبونە مرۆییەکانی بۆ کورد و کوردستان و ئەویش چەند پرسیاری لێ کردم سەبارەت بە خۆم و ژیانم کە باسی ئەوەم کرد کە دوو ساڵ و چەند مانگە لە فینلاند دەژیم و زارۆکێکم هەیە، ئەو پرسیاری تەمەن و ناوی منداڵەکەمی کردو هەروەها وتی کچە یا کوڕ؟

ئەوەی کە زۆر بەلامەوە سەرنجراکێش بوو ئەوە بوو کە باسی ئەوەی کرد کە دەبێ منداڵەکەم فێری کوردی بکەم و پێداگری لەسەر دەکردەوە کە دەبێ فێری نوسی و خوێندەوەی بە کوردیش بکەم. ئەوەم زۆر بەلاوە سەرنجراکێش بوو، چەنکە بەراستی لەوانەیە زۆر لە دایک وباوکە کوردەکان ئەوەیان هەر بۆ گرینگ نەبێت کە داخوا منداڵەکەیان دەزانن بە کوردی بنوسن و بخوێننەوە!