*وتووێژ: چیا کوردستانی
لاوان: كاك حەسەن بەڕێزتان سەرەتا لە كەیەوە چالاكی سیاسیتان دەست پێ كردوە یان بە واتایەكی تر چالاكی سیاسیتان بۆ كەی دەگەڕێتەوە؟
حەسەن قادر زادە: دەسەڵاتداری حكوومەتی سەرەڕۆی پاشایەتی پەهلەوی بەسەر ژیان و ماڵی خەڵك دا بە شێوەیەك بوو كە زوڵم و ستەم و بێدادی دەكرد، لە بوارە جۆراو جۆرەكانی ژیانی سیاسی، كۆمەڵایەتی، ئابووری و نەبوونی ئازادی باڵی بەسەر وڵات دا كێشا بوو، هەموو كەس هەستی بە ناعەداڵەتی و نایەكسانی دەكرد.
ئێران زیندانێكی گەورە بوو بۆ خەڵكی، گەلی كورد بە هۆی زوڵم و ستەمی نەتەوایەتی¬یەوە زیاتر هەستی بە ئازار و مەینەتی¬یەكانی دەكرد، گەلانی ئێران بە هەموو چین و توێژەكانی¬یەوە بۆ لابردنی ئەو دەسەڵاتە نەگریسە هاتنە مەیدان و لە شۆڕشێكی سەرانسەری و هەمەلایەنەدا لە ساڵی 1357ی هەتاوی دا تۆماری 2500 ساڵەی پاشایەتیان لە ئێراندا تێكەوە پێچا. منیش وەك تاكێكی ئەو كۆمەڵگایە زۆر بە ڕوونی ئازارو مەینەتی¬یەكانی خەڵكی كوردستانم هەست پێ دەكرد، لە بنەماڵەی خۆمان دا قوربانی زەبرو زەنگ و ئەشكەنجە و زیندان بووین، بە تایبەتی كە برای گەورەی شەهیدمان كاك محەممەد قادرزادە لە ساڵی 47 بە تاوانی هاوكاری لەگەڵ تێكۆشەرانی دَیموكڕات لە جوڵانەوەی چەكدارنەی ساڵانی 47 ــ 46دا گیرا و ماوەی پێنج ساڵ زیندانی بەسەردا سەپا و لە ساڵی 1352ی هەتاوی ئازاد كرا، ئەوە رووداوێك بوو كە هەمیشە زوڵم و دیكتاتۆری ئەو رێژیمەمان بە رەگ و پێستەوە هەست پێ دەكرد. بۆیە لەگەڵ دەست پێ كردنی خەباتی گەلانی ئێران لە دژی رێژیمی پاشایەتی و سەرهەڵدانی خۆپیشاندانەكان و رێ¬پێوانەكان، لەگەڵ شەپۆلی ئەم خەڵكە وەزاڵەهاتووە كەوتم و لە خۆپیشاندانەكان دا چالاكانە بەشداریم كرد، هەر لە و سەردەمەدا بیری سیاسی و خەباتگێڕانەم لە هەست و هزرمدا گەشەی كرد، پاش رووخانی رێژیمی پاشایەتی و ئاشكرا بوونی خەباتی سیاسی حیزبی دێموكڕاتی كوردستان، بە كردەوە تێكەڵ بە كاری سیاسی و رێكخراوەیی بووم و لە ڕیزی یەكیەتیی لاوانی دێموكڕاتی كوردستانی ئێران دەستم بە خەبات و تێكۆشان كرد و لەگەڵ سیاسەتەكانی حیزبی دێموكڕاتی كوردستان ئاشنا بووم.
لاوان: دەكری بۆمان باس بكەی كە ناوی پیشمەرگە لەكەیەوە هاتۆتە نێو ئەدەبیاتی كوردی و هەروەها بفەرمووی كە چ كاتێك و كێ ئەو ناوەی بۆ هێزی نیزامی كورد هەڵ بژاردوە؟
حەسەن قادر زادە: پێش ئەوەی بچمە سەر وەڵامی پرسیارەكە و باسی ناوی پیرۆزی پێشمەرگەتان بۆ بكەم، كە لە كەیەوە هاتۆتە ناو ئەدەبیاتی كوردی و چۆن ئەو ناوە دیاری كراوە بە دەرفەتی دەزانم لە رێگای گوڤارە خۆشەویستەكەتان "لاوان" كە ئێستا لە بەرەبەری بەڕێوەبردنی رێ و رەسمی 26ی سەرماوەز رۆژی پێشمەرگەی كوردستان داین، گەرمترین پیرۆزبایی ئاراستەی تەواوی پێشمەرگەكانی كوردستان و تێكۆشەرانی خەباتگێڕ بە گشتی و پێشمەرگەكانی حیزبی دێموكڕاتی كوردستان، ئەندامان و بنەماڵەی سەربەرزی شەهیدان و پێشمەرگەكان بە تایبەتی بكەم، كە لە پێناو وەدیهێنانی مافە رەواكانی گەلەكەمان دا ئامادەن گیانیان بەخت بكەن.
سەبارەت بە ناوی پیرۆزی پێشمەرگە، بە پێی ئەو سەرچاوە و لێدوان و رەوایەتانەی كە تا ئێستا كراوە، لەگەڵ ئەوەی دا كورد زۆر لە مێژە بۆ داكۆكی لە مافە رەواكانی و مل نەدان بۆ زوڵم و سەرەڕۆیی و بۆ روبەروبوونەوە لە بەرامبەر هێرشی دوژمنان و داگیر كران دا، رۆڵەی خەباتگێڕ و چەك لە شانی هەبوو،بەڵام ناوی پێشمەرگە دەگەڕێتەوە بۆ ساڵی 1324ی هەتاوی بەرامبەر بە 1945ی زایینی پاش ئەوەی دوایین پێگەی سەركوتی رێژیم لە شاری مەهاباد لە رۆژی 26ی سەرماوەزدا لە لایەن خەڵكەوە دەستی بەسەردا دەگیرێ، بە دوای ئەوەدا كۆماری كوردستان دادەمەزرێ و سوپای میللی كوردستان پێك دێ.
سەبارەت بە دیاری كردنی ناوی پێشمەرگە، ئەوەی من بیستوومە و خوێندومەتەوە، كاتێك بەرپرسانی سوپای میللی لەگەڵ پێشەوا قازی محەممەد لە ئۆفیسی كارەكەی كۆ دەبنەوە، دەیان هەوێ ناوێك بۆ ئەو رۆڵە خەباتگێڕ و چەك لە شانانە دیاری بكەن، كە بۆ دیفاع و بەرگریی لە خاك و نیشتمانەكەیان لە سوپای میللی دا رێك خراون، لەو كۆبوونەوەیەدا باسێكی زۆر و ئاڵ و گۆڕی بیروڕا دەكرێ و چەند ناوێك دێتە ئاراوە، گۆیا چا پەزی ئۆفیسی كاری پێشەوا قازی محەممەد كە پیاوێكی گەڕاوەو خاوەن ئەزموون دەبێ، جاروبار دەچێتە ژوورەوەو گوێی لەو باسانە دەبێ، ئیزن دەخوازێ و دەڵێ ئێوە ماوەیەكی زۆرە لەسەر مەسەلەیەك قسە و باس و ڕاوێژ دەكەن و ساغ نابنەوە دەكرێ پێم بڵێن چیە و باسی چی دەكەن؟! یەكێك لە بەشدارانی كۆبوونەوەكە دەڵێ دەمان هەوێ ناوێك بۆ چەكداری كورد دانێین كە چەكی بە دەستە، ئەویش دەڵێ: جا ئەوە چیە لە كۆن دا كورد بە پیاوی ئازاو ڕەشید و نەترسی خۆی گوتووە پێشمەرگە، ئامادەبووان ئەو ناوەیان زۆر بە ناوێكی شیاو و باش دەزانن و هەر لەوێ ئەو ناوە بۆ چەكداری كورد دیاری دەكەن و هەر لەو رۆژەوە بە چەكداری كورد كە خزمەتی گەل و نیشتمانەكەی بكا پێی دەڵێن پێشمەرگە، كە بۆتە سەمبولی ئازایەتی و خۆڕاگری و فیداكاری و خۆشەویستی كۆمەڵانی خەڵك، كەوابوو هەر بە دامەزرانی سوپای میللی دیاری كردنی ناوی پێشمەرگە، ئەو ناوە هاتۆتە ناو ئەدەبیات و فەرهەنگ و شێعڕ و پەخشانی كوردی و لە وەسفی پێشمەرگەدا زۆر شتی جوان و بە كەڵك گوتراوە و نووسراوە، كە مایەی شانازی و شەڕەفی گەلەكەمانە.
لاوان: كاك حەسەن لە ڕوانگەی بەرێزتانەوە پێشمەرگە چ واتایەكی هەیە و چۆنی پێناسە دەكەن یانی چ پێناسەیەكت بۆ پێشمەرگە هەیە؟
حەسەن قادر زادە: پێشمەرگە ئەو ڕۆڵە خەباتگێڕ و شۆڕشگێڕەیە كە بە بیرو باوەڕەوە لە پێناو ئازادی و رزگاری بۆ وەدیی هێنانی مافە رەواكانی گەلی كورد چەكی شەڕەف و سەربەرزی كردۆتە شان و ئامادەیە لەم رێگایەدا گیانی بەخت بكا و دەست لە هەموو خۆشی¬یەكانی ژیان هەڵ بگرێ و بە سەر كەندو كۆسپەكانی رێگای خەبات و تێكۆشان دا زاڵ بێ و شەوە زەنگی بێدادی شەق بكا و بەهاری ئازادی بۆ گەل بێنێ. بەواتایەكی دیكە پێشمەرگە سەمبولی فیداكاری و گیان بازی، دڵسۆزی، سەداقەت، لە خۆبردوویی، بوێری، وڵات پارێزی و ورە و ئیمانە. لەیەك كەلام دا ئەو تێكۆشەرە كۆڵنەدەرەیە كە بۆ بەختیاری گەل و وڵاتەكەی، مەرگی وەپێش دەخات و بە بێ ترس و دوو دڵی ئامادەیە سەرمایەی ژیانی كە گیانیەتی بەختی بكا، بۆیە پێشمەرگەیە.
لاوان: پێشمەرگەی دوێنێ و ئەمڕۆ چ جیاوازیەكیان هەیە (لە هەموو لایەنەكانەوە)؟
حەسەن قادر زادە: بە بڕوای من هیچ جیاوازی¬یەك لە نێوان پێشمەرگەدا نیە، بە مەرجێك پێشمەرگە بێ. پێشمەرگەی دوێنێ و ئەمڕۆ خاوەنی یەك تایبەتمەندین، پێشمەرگە ئەو خەباتگێڕە سیاسی و بە بیروباوەڕەیە كە لە پێناو بەرگری و مان و مەوجوودی¬یەتی گەلەكەی دا خەبات دەكا و، حازرە تەواوی سەختی و ناخۆشی¬یەكانی شۆڕش و خەبات بە دڵ قەبووڵ بكا و تا گەیشتن بە ئامانجە پیرۆزەكانی گەل، ئەو خەباتە درێژە بدا. هەتا گەلی كورد لە ژێر هەڕەشە و مەترسی¬دا بێ و مافە رەواكانی دەستەبەر نەكرابێ، ئەركی نەتەوەیی لەسەر شانە و وەك درێژەدەری رێبازی پیرۆزی شەهیدان لەو مەیدانەدا تێ دەكۆشێ‌َ. ئەگەر جیاوازی¬یەك هەبێ، جیاوازی قۆناغەكانی خەباتە نەك جیاوازی پێشمەرگە، مەبەست لە پێشمەرگەی دوێنێ لە ڕوانگەی ئێوە قۆناغی خەباتی سیاسی و چەكداری گەلی كورد لە رۆژهەڵاتی كوردستانە لە دژی سیاسەتی هێرش و سەركوتی كۆماری ئیسلامی كە لە دەیەكانی 60 و 70ی هەتاوی دا لە ئارادا بوو كە لەو قۆناغەدا خەباتی گەلی كورد لە چەند بواری جیاواز، بەڵام پێكەوە گرێ دراو بەڕێوە دەچوو، شێوەی چەكداری لە هەموو شێوەكانی دیكە بەهێزتر و دژوارتر بوو، لەو شێوەیەدا رۆڵە خەباتگێڕەكانی گەلی كورد، پێشمەرگەكانی حیزبی دێموكڕات بە خوێن بەرگریان لە مان و مەوجوودی¬یەتی گەلەكەیان دەكرد، بە هەزاران حەماسە و ئازایەتی لە خەبات و بەرگری دژی سوپای دژی گەلی كۆماری ئیسلامی دا تۆمار كراوە كە گەلی كورد و نەسڵەكانی داهاتوو شانازی¬یان پێوە دەكەن، ئەو قۆناغە لە خەباتی گەلەكەمان لاپەڕەیەكی زێرینە لە مێژووی بزاڤی ڕزگاری خوازانەی گەلی كورد كە بە هەزاران رۆڵەی خەباتگێڕی لە پێناوی دابین كردنی مافە رەواكانی دا كردۆتە قوربانی و شەو و شەونخوونی¬یان كێشاوە، تاڵی و سوێری خەباتیان چێشتووە كە بۆتە سەرمایەكی گەورەی ماددی و مەعنەوی كە كاریگەریی بۆ ئێستاش و داهاتوو هەر دەمێنێ. كەوابوو پێشمەرگە ئەو رۆڵە خەباتگێڕو تێكۆشەرەیە كە هەردەم وەك باسكی بە هێزی گەل لەو مەیدانەدا تێ دەكۆشێ و هەوڵ دەدا بۆ پاراستنی بەرژەوەندی¬یەكانی گەل و خزمەتی نەتەوە ژێر دەست و زوڵم لێ كراوەكەی. پێشمەرگە پێش ئەوەی چەكدارێكی سرف بێ، تێكۆشەرێكی سیاسی¬یە، كە ئاگاهانە چەكی بەرگری كردوتە شان و ئاگاهانەش ئامادەیە لە پێناوی بیروباوەڕەكانی¬دا گیانی بەخت بكا.
پێشمەرگە هەڵگری پەیامی گەلەكەیەتی و وەدیی هێنەری ویست و داخوازەكانیەتی، بۆیە لە هەموو بوارەكانی سیاسی، دیپڵۆماسی، راگەیاندن، تەشكیلاتی، كۆمەڵایەتی و چەكداری و...هتددا، چالاكانە بەشداری دەكا. بۆیە ئەركی هەموو لایەكە رێز لە خەبات و تێكۆشان و ماندوویی و گیان بازی پێشمەرگە بگرن و وەك گلێنەی چاو بی پارێزن و پشت و پەنای پێشمەرگە بن.
لاوان: پێتان وایە كە پێشمەرگەی دوێنێ لەو قۆناغەی كە تێیدا چالاك بووە توانیویەتی ئەركی خۆی بەجێ بگەیەنێ؟
حەسەن قادر زادە: خەبات و تێكۆشانی هێزی پێشمەرگە، فیداكاری و گیان بەخت كردنی رۆڵەكانی گەل شاهیدی چالاكی و هەڵسوڕاوی بێ وچانی قۆناغەكانی پێشوویان بووە، كە ئیستاش درێژەی هەیە، ئەو خەباتگێڕانە بە خوێنی خۆیان بەڵگەی هەرمانی گەلەكەیانیان پاراستووە، هیچ فیداكاری¬یەك نەبووە كە نەیكەن، ئەوەی لە توانا و ئیمكانی ئەو هێزەدا بووە بە بێ هیچ چاوەڕوانی¬یەك كردوویەتی و لە هیچ شتێك تەنەخیان نەكردوە. دیارە هێندێك فاكتەر و هۆكار هەن كە بە پێی شەرایەت و شوێن كاریگەریان لەسەر چالاك و ناچالاك بوونی قۆناغێك دەبێ، بەڵام دەكرێ بڵێین ئەو قۆناغەی كە ئێوە مەبەستتانە، چالاكترین قۆناغ بووە كە پێشمەرگە خەباتی تێدا كردوە، بەڵام ئەوەی كە كورد لەو قۆناغەدا نەی توانیوە بە ئامانجەكانی بگا، بەو مانایە نیە كە رۆڵە خەباتگێڕەكانی، تێكۆشەرانی سیاسیی و هێزی پێشمەرگە چالاك نەبوون، لێرەدا مەجالی ئەوە نیە بە دوورودرێژی باسی هۆكارەكان بكەین، هەل و مەرجی نێوخۆیی ئێران، كوردستان و ناوچە، یەكگرتوویی بزووتنەوەی كورد، توانا و ئیمكاناتی پێشمەرگە، ستراتیژی خەبات و پڕۆژەو بەرنامەكان كاریگەریان لە هەرچی زیاتر بەرەوپێش چوونی ڕەوتەكەدا دەبێ كە بێ گومان لەو بارەوە كەم و كوڕیمان بووە ئەوەش هیچ لە گەورەیی و فیداكاری پێشمەرگە كەم ناكاتەوە و ئەوەی پێی سپێردرابێ لەو قۆناغەدا وەك رەسالەتێك ئەنجامی داوە.
لاوان: بە بڕوای بەڕێزتان پێشمەرگە ئەوڕۆ دەبێ چ تایبەتمەندی¬یەكی هەبێ؟
حەسەن قادر زادە: پێشمەرگە حاوەنی كۆمەڵێك تایبەتمەندی¬یە كە لە گەڵ خەڵكی ئاسایی دیكەی لێك جیا دەكاتەوە ئەویش ئەوەیە، كە خاوەن بیروباوەڕە، بە ویست و ئیرادەی خۆی هاتۆتە ڕیزی خەبات و شۆرش، بڕوای بە خەبات دژی سەرەڕۆیی و دیكتاتۆڕی هەیە بۆ رزگاری نەتەوەكەی و بۆ وەدیی هێنانی ئامانجەكانی گەلەكەی تێ دەكۆشێ و بە بێ ئەوەی چاوەڕوانی هیچ پاداشێك بێ ئامادەیە گیانی بەخت بكا.
پێشمەرگە دەبێ هەوڵ بدا ئاستی زانیاریی خۆی بەرێتە سەر و وشیاری سیاسی و بیری نەتەوەیی هاندەری بێ بۆ ئەوەی زیاتر سوور بێ لەسەر ئامانجەكانی.
رێز بۆ بیروڕای خەڵك و داب و نەریتە كۆمەڵایەتی¬یەكان دابنێ، دژی خورافات و كۆنەپەرەستی بێ، مرۆڤ دۆست بێ، دژی چەوسانەوە بێ، بڕوای بە مافی یەكسانی نێوان ژن و پیاو هەبێ، لە دژی پێشل كردنی مافەكانی ژنان بێ.
سادق و راستگۆ بێ، متوازیع بێ، بڕوای بە بیروڕای جیاواز هەبێ، هەوڵ بدا پێوەندی¬یەكی زۆر پتەو و دڵسۆزانەی لە گەڵ كۆمەڵانی خەڵك هەبێ لەگەڵ خۆشی و ناخۆشی¬یەكانیان دا بێ.
كاتی خۆی بە فیڕۆ نەدا و هەوڵ بدات بۆ پێگەیاندنی خۆی و كەسانی دەوروبەری بەسوود و بە بەهرە بێ. تەك رەویی نەكا، دژی سەرەڕۆیی بێ، عەداڵەت خواز بێ، ناحەقی قەبووڵ نەكا، هەست بە بەرپرسایەتی بكا، ئەركەكانی بە باشی بەڕێوەبەرێ، رەخنەگر بێ، بەڵام رەخنەكانی سازەندە و ئامووزەندە بن، رەخنە قەبووڵ بكا، هەوڵ بدات پێوەندی¬یەكی سالمی تەشكیلاتی لە ئۆرگانەكانی حیزبی دا هەبێ، لە رووی ئوسوول و زەوابت كارو ئەركەكانی بەڕێوەبەرێ، كات ناس بێ، پاك و خاوێنی بپارێزێ، دۆستی ژینگە بێ، لە ئیمكاناتی زانستی و تەكنۆلوژیای سەردەم بە باشی كەڵك وەربگرێ، هەوڵ بدا بە وەدەست هێنانی زانیاری پێویست و گەیاندنی پەیامی نەتەوەكەی كەڵك لە میدیا بە گشتی و كەرەسەكانی گەیاندن و وەرگرتن بگرێ. بە شێوەیەكی مودێڕن و شارستانیانە لەگەڵ پاراستنی ئوسوول و پڕەنسیپەكانی راگەیاندن، هەموو لایەنە ئینسانی و ئەخلاقی¬یەكان لەبەر چاو بگرێ و رێز لە كەرامەت و كەسایەتی مرۆڤ بگرێ و زەربە بە ئێعتیبار و پڕستیژی پێشمەرگە نەگەیەنێ.
پێشمەرگە دەبێ نەهێنی پارێز بێ، هەوڵ بۆ پتەوبوونی ریزەكانی تەشكیلاتی حیزبەكەی بدات، ئەوانە بەشێكی كەم لە تایبەتمەندی¬یەكانی پێشمەرگەن.
لاوان: ئێمە وای دەبینین كە حیزبەكانی رۆژهەڵات پێشمەرگەیان بە بیرێكی نیشتمانی و نەتەوەیی پەروەردە نەكردوەو زیاتر بە بیرێكی حیزبیانەوە پەروەدەیان كردووە كە ئەوەش بە زیانی نەتەوەكەمان دەشكێتەوە لە داهاتوودا، بەڕێزت لەو بارەوە چ دەفەرموون و ڕوانگەتان چیە؟
حەسەن قادر زادە: سەبارەت بە بیری نیشتمانی و نەتەوەیی پێشمەرگە و حیزبەكانی رۆژهەڵاتی كوردستان، ئەوەی پەیوەندی بە خەبات و تێكۆشانی حیزبەكانی رۆژهەڵاتی كوردستانەوە هەیە، لێرەدا پێویستە ئاماژە بە خاڵێك بكەم، ئەویش ئەوەیە كە هەر حیزب و رێكخراوێك بە پێی بیروباوەڕەكانی، ستراتیژی و دروشمەكانی یا ئایدیولوژی حیزبەكەی، ئەندامانی پەروەردە دەكا، بۆ وێنە حیزبێك هەڵگری بیروباوەڕی چینێك بێ و بڕوای بە مافی نەتەوایەتی نەبێ، با حیزبێكی رۆژهەڵاتی كوردستانیش بێ، بەڵام بەرپرس نیە لە پەروەردە كردنی ئەندامانی بە بیرێكی نەتەوایەتی، بەڵام ئەوەی دەگەڕێتەوە سەر حیزبی دێموكڕاتی كوردستان ئەوەیە كە ئەم حیزبە هەر لە سەرەتایی دامەزرانی¬یەوە بە بیرێكی نەتەوایەتی¬یەوە پێی ناوەتە گۆڕەپانی خەباتی سیاسیی و نەتەوایەتی، بناغەی بیروباوەڕەكانی ئەو حیزبە بۆ رزگاریی نەتەوەیی و بۆ وەدەست هێنانی مافە نەتەوەیی¬كان داڕێژراوە و لەو پێناوەدا خەباتی كردووەو هەزاران رۆڵەی ئەم گەلەش گیانیان بەخت كردووە. زۆر جار لە زمان كەسانێك دەگوترێ كە كوردایەتی ناكەن، خەریكی حیزبایەتین، ئەوە لە كاتێك دایە كە حیزب وەسیلەیەكە بۆ گەیشتن بە ئامانجەكان بە تایبەتی كە حیزبێك وەك حیزبی دێموكڕات كە خەبات دەكا بۆ دێموكڕاسی، بۆ وەدیی هێنانی مافی نەتەوایەتی لە وڵاتێكی دێموكڕاتیك بە شێوەی فیدراڵی، كەوابوو لێرەدا حیزبایەتی لە پێناو مافی نەتەوایەتی و كوردایەتی دایە، پەروەردە كردنی نەتەوەیی لەگەڵ بیری حیزبی هیچ جیاوازی¬یەكیان نیە، لەبەر ئەوەی بیری حیزبی دێموكڕات بیرێكی نەتەوەیی¬یە، ئەوەی لە رووی فكر و ستراتیژیەوەیە، نەتەوەیی¬یە بۆیە پەروەدەی حیزبی، پەروەردەی نەتەوەیی¬یە. حیزبی ئێمە هەوڵی زۆری داوە بۆ پەرە پێدان و گەشەی بیری نەتەوەیی و بردنە سەری ئاستی وشیاریی سیاسیی و نەتەوەیی كۆمەڵانی خەڵك و هەروەها بە دانانی دەورەی جۆراوجۆری سیاسی، تەشكیلاتی، سیاسی نیزامی، كادرو پێشمەرگە و ئەندامانی پەروەردە كردووە. لە لایەكی دیكەش لە ماوەی ئەو 65 ساڵەی¬دا راگەیاندن و ئەدەبیاتی حیزبی دێموكڕات نەتەوەیی بووەو لە پێناوی خزمەت بە فەرهەنگ و كلتووری شوڕشگێڕانەی گەل و نیشتمانەكەی دابووە، بۆ ئەوەی خەباتی نەتەوەیی رێبەری بكا و لەو رێگایەوە بە ئامانجە نەتەوەیی¬یەكانی بگا.
لاوان: پێتان وانیە كە حیزبەكان كەمتر گرینگیان داوە بە پەروەردەی سیاسی پێشمەرگە و زیاتر لە رووی نیزامی¬یەوە پەروەردە كراون واتە حیزبەكان گرینگی¬یەكی ئەوتۆیان بە پەروەردە كردنی پێشمەرگە لە بوارەكانی كۆمەڵایەتی، سیاسی و فەرهەنگی¬دا نەداوەو زیاتر پڕژاونەتە سەر بواری نیزامی، هۆكارەكەی چیە و بۆ؟
حەسەن قادر زادە: هەر حیزب و رێكخراوێكی سیاسی بە پێی پڕۆژە و بەرنامەكانی خۆی هەوڵ دەدا پێشمەرگە پەروەردە بكا، ئەوەش دەگەڕێتەوە بۆ هەل و مەرج و قۆناغی خەبات و پێداویستی¬یەكانی. بە بڕوای من پەروەردە و راهێنانی هێزی پێشمەرگە لە هەموو قۆناغێك و لە هەموو بوارەكان دا بە تایبەتی لە بواری نیزامی¬دا زۆر پێویستە و لازمە، ئەو هێزە بایەخی خۆی هەیە و هەتا كورد هەبێ و ئاوا ڕووبەڕووی مەترسی سەرەڕۆیی و دیكتاتۆڕی بێ، دەبێ وەك گلێنەی چاو بی پارێزێ و ئیمكاناتی پێویستی بۆ ئامادە و تەرخان بكا. پەروەردە كردنی پێشمەرگە سەرەڕای ئەو گرینگی¬یە بۆ پارێزگاری لە دەسكەوتەكانی جووڵانەوەی رزگاری خوازانەی و پاریزگاری لە خۆی و لە بنكەو بنیاتەكان و رێبەرایەتی حیزب لە هەموو بارێكەوە تەنانەت بۆ خەباتی پارتیزانی و شێوەكانی دیكە لازم و پێویستە بە تایبەتی كە لە ئێران و ناوچەكە چاوەڕوانی ئاڵ و گۆڕی خێرای لێ دەكرێ، دەبێ زیاتر لە هەمیشە ئەو هێزە ئامادەیی تەواوی هەبێ، بۆ هاتنە پێشی هەر ڕووداو و ڕووبەڕووبوونەوەیەكی چاوەڕوان نەكراو. لە بوارەكانی دیكەش دا پەروەردەی سیاسی، تەشكیلاتی و... هتد، لە لایەن حیزبەوە بە پێی توانا و ئیمكان هەوڵی داوە كە دەورەی جۆراوجۆر لە قۆناغەكانی سەرەتایی، ناوەندی و عالی دا بەڕێوەبەرێ، حیزبی ئێمە پەروەدە و راهێنان و پێگەیاندنی كادرو پێشمەرگەی بە ئەركی هەمیشەیی خۆی زانیوەو دەزانێ، ئەوە تا ئێستا كراوە كافی و تەواو نەبووە، بەڵكوو بە پێی توانا و ئیمكان كەڵك لە هەل و مەرجەكە وەرگیراوە و تێكۆشاوە ئەوەندەی بۆی دەكرێ لەو دەرفەتانە كەڵك وەربگرێ بەڵام زۆر دڵ خواز نەبوون.
لاوان: لە كۆتایی¬دا سپاست دەكەین كە ئەم دەرفەتەت دا بە ئێمە تا لە خزمەتت دابین و وەڵامی پرسیارەكانت داینەوە.
منیش بە نۆبەی خۆم سوپاستان دەكەم بۆ ئەو دەرفەتەی بۆتان ڕەخساندم كە وەڵامی پرسیارەكانی گوڤارەكەتان "لاوان" بدەمەوە، بۆیە سەركەوتن و پێشكەوتنی زیاتر رێكخراوەكەتان "یەكیەتیی لاوانی رۆژهەڵاتی كوردستان" ئاواتە خوازم.
هەر سەركەوتوو بن.
بیۆگڕافی كورتی حەسەن قادرزادە
لەساڵی 1340ی هەتاوی لە گوندی نستان لە ناوچەی گەوركایەتی سەردەشت لە دایك بووەو لە ساڵی 1358ی هەتاوی بۆتە ئەندامی یەكیەتیی لاوانی دێموكڕاتی كوردستانی ئێران و ئەندامی بەڕێوەبەری لاوانی سەردەشت و لە ساڵی 1359ی هەتاوی بە ڕەسمی بۆتە پێشمەرگەی حیزبی دێموكڕات.
ماوەی 30 ساڵە پێشمەرگەیە، بەرپرسایەتی جۆراوجۆری لەو حیزبەدا بە ئەستۆ گرتووە وەك بەرپرسی كومیتە شارستانەكانی بانە، رەبەت و سەردەشت، بەرپرسی ناوەندی 2ی كوردستان، بەرپرسی فێرگەی سیاسی نیزامی حیزب، بەرپرسی كومیسیۆنی تەشكیلات.
ماوەی 20 ساڵە ئەندامی رێبەرایەتی حیزبی دێموكڕاتی كوردستانە و دوو دەورەیە ئەندامی دەفتەری سیاسی¬یە.
رادەی خوێندەواری لیسانسی علومی سیاسی¬یە.
خێزاندارە و خاوەنی سێ منداڵە.
*ئەم وتووێژە لە گۆڤاری ژمارە ٤٠ لاواندا بڵاوبۆتەوە.
هیچ نظری موجود نیست:
ارسال یک نظر